Молитвы на Сретение Господне

Молитва первая к Господу Иисусу Христу

Господи Иисусе Христе, Единородный Сыне и Слове Божий,
древле во пророцех Виденный, якоже зерцалом в гаданий,
в последок же дний сих плотию от Пресвятыя Девы Марии нетленно рожденный
и в четыредесятный день сей во Святилище во Сретение всему миру от Тоя,
яко Младенец руконосим, явленный и во объятиях праведнаго Симеона
во спасение всем сущим от Адама носимый!

Коль преславно и пресветло Твое на руку Богоматери во храм Господень принесение
и от святаго старца Божественное сретение Твое!
Днесь небеса веселятся и радуется земля, яко видена быша шествия Твоя, Боже,
шествия Бога нашего Царя, Иже во Святем.
Древле Моисей восходит видети славу Твою, но не возможе увидити Лица Твоего,
зане явил еси ему точию задняя Своя.

В пресветлый же день сей Сретения Твоего Ты явил еси Себе человеком во святилище,
сияя неизреченным Светом Божества, да вкупе с Симеоном видят Тя лицем к лицу и руками
да осяжут Тя, и восприемши во объятия своя, да познают Ти Бога во плоти пришедша.

Сего ради прославляем неизреченное снисхождение и велие человеколюбие Твое,
яко пришествием Твоим даровал еси ныне небесную радость падшему древле роду человечу:
Ты бо праведным судом Своим изгнал еси прародители наши из рая сладости в мир сей,
ныне же помиловал еси нас и паки отверзл нам райския обители и обратил еси плач наш на радость,
да падший Адам к тому уже да не стыдится Тебе за преслушание и да не будет скрыватися Лица Твоего,
Тобою призываемый, яко Ты пришел еси ныне, да возьмеши на Себе грех его,
да омыеши его Своею Кровию и да облечеши его нага суща в ризу спасения и одежду веселия
и украсиши его, яко невесту красотою.

Нам же всем Божественное Твое Сретение воспоминающим,
сподоби с мудрыми девами изыти на Сретение Твое, Небесному Жениху нашему,
с горящими светильниками веры, любви и чистоты,
да улицезрим очами веры Божественное Лице Твое,
да восприимем Тя в душевныя объятия своя,
и да понесем Тя в сердце своем во вся дни Живота своего,
да будеши нам в Бога и мы в людие Твои.

В последний же и Страшный день Пришествия Твоего,
егда вси святии изыдут на последнее и великое Сретение Твое на воздусе,
сподоби и нам усрети Тя, да тако всегда с Господом будем.

Слава Милосердию Твоему, Слава Царствию Твоему, Слава смотрению Твоему,
Едине Человеколюбче, яко Твое есть Царство, и Сила, и Слава
со Безначальным Твоим Отцем и Пресвятым и Благим и Животворящим Твоим Духом
ныне и присно, и во веки веков. Аминь.

Молитва вторая к Пресвятой Богородице

О, Пресвятая, Небесною чистотою Сияющия Дево, Кроткая голубице, Нескверная Агнице,
миру Благая Помощнице, Мати Христа Бога нашего!

Ты еси начало, средина и конец нынешния радости нашея,
яко из Тебе возсия Солнце Правды Христос Бог наш и Того принесла еси
на святых объятиях Своих в четыредесятный день сей во Святилище на сретение наше
и на радость и спасение всему миру.

Сего ради и ублажаем и прославляем Тя, яко Ты еси Скиние Бога с человеки Богословом Предзримая,
Ею же Бог вселися с нами, да мы людие Его будем?

Ты еси Дверь Небесная Иезекиилем Предреченная, Еюже отверзошася паки нам
входы в райския обители. Ты еси Лествице Высокая, Иаковом Предвидимая,
Еюже сниде Бог на землю и Мосте, преводяй сущия от земли на небо.
Темже молим Тя, взирающе, яко пошла еси во Святилище,
носящи Огнь Небесный рукама Своима Бога, Благодатная.

Огнем молитвы Твоея попали огнь страстей наших, да избавимся вечнаго огня геенскаго.

Во Святилище пришла еси очищения ради законного, очищения не требующая,
яко Дева Чистая и сим научи нас како подобает нам хранити себе в целомудрии и чистоте
и с каковым смирением подобает нам провождати подвиг девства, памятуя, како Ты,
превыше Херувим Сущая, стала еси на месте нечистых жен.

Ты, о, Мати Пресвятая, Сама сущи Боговместимый храм Божий принесла еси в церковь законную
Превожделеннаго сына Твоего, Христа Бога нашего,
сподоби и нам паче всего на земли любити храмы Сына Твоего, посещати я во вся дни живота нашего,
зрети тамо красоту Господню, яко лучше един день приметатися во дворех Господних,
паче неже жити в селениих грешничих. Наипаче же даруй нам, Пречистая, яко же Симеону,
неосужденно носити Сына Твоего и Бога нашего в сердечных объятиях Своих,
егда причастницы будем Пречистаго Тела и Крови Его,
и помози нам тогда сугубо хранити себе во святыне и страхе Божиим,
да не растлим храм плоти нашея.

И тако выну сретаюше, о Богомати, Сына Твоего в сердцах и душах наших,
да сподобимся молитвами Твоими достигнути и блаженнаго онаго Сретения Господня на воздусе,
егда со всеми святыми выну будем славити и воспевати Пресвятое Имя Его
со Отцем и Святым Духом и Твое милостивое предстательство ныне и присно и во веки веков.
Аминь.

Тропари Сретению Господню

Тропарь, глас 1 (Предпразднеству)

Небесный лик Небесных Ангел, приник на землю, пришедше зрит яко Младенца, носима к храму,
Перворожденна всея твари от Матере Неискусомужныя, предпразднственную убо с нами поют песнь,
радующеся.

Тропарь, глас 1

Радуйся Благодатная Богородице Дево, из Тебе бо возсия Солнце правды Христос Бог наш,
просвещаяй сущия во тьме: веселися и ты, старче праведный, приемый во объятия
Свободителя душ наших, дарующаго нам воскресение.

Кондак, глас 4

Утробу Девичу освятивый рождеством Твоим, и руце Симеоне благословивый,
якоже подобаше, предварив, н ныне спасл еси нас, Христе Боже;
но умири во бранех жительство, и укрепи православныя христианы,
их же возлюбил еси, едине Человеколюбче.

Величание

Величаем Тя, Жизнодавче Христе, и чтем Пречистую Матерь Твою,
Еюже по закону ныне принеслся еси в храм.

========================================================

Молитва от бесплодия

Молитва святой богопраматери Анне,
разрешающей узы безчадия и неплодия.

Благоугодный корень, израстивший былие благоплодное и вечноцветущее – препетую Богородицу, из Нея же произыде Начальник жизни и Совершитель веры Иисус Христос, многоточный источник, из неяже произыде, яко поток сладости и река мира Благословенная в женах, источающая бездну благ и неизреченное море благости и бесконечного блаженства. Предопределенная чревоносити несравненно Светлейшую лучей солнечных, Еяже прозреша и проповедаша пророческие трубы. Познанная от Плода ея, Царицы Ангелов и вышшей сущей небес, яко сосуд избранный Святаго Духа и вместилище благодати яснейшее. Образ праведности и непорочного жительства и мудрости луг благоуханный и сладкоблаговонный. Исполняющая законная повеления в правости сердца и горящем благоговении и всяким тщанием со блаженным своим супругом и богоносцем Иоакимом. Божественным волением зачавшая в старости маститей и рождшая прежде век предопределенную родитися Матерь Божию. Прамати всемилостивого и всещедраго Бога, готовое заступление и предстательство с верою прибегающих к тебе, утешение страждущих и покой скорбящим, благодатию Внука твоего показующая безчадных и неплодных жен благочадны, приими и моление нас грешных и преложи печаль безчадия молящихся тебе в радость.

Даждь плод чрева призывающим тя, разрешая мрак их безплодия и, яко разрешение безплодия, безчадных жен благочадны сотвори ублажающих тя и славословящих Богочеловека – Внука твоего и Создателя и Господа.

Ей, блаженная и благодатная Анна, всем, яко луна пресветлая, посылающая мирный и тихий свет богоданных в тебе дарований, показавшаяся Сарры честнейшая, Анны матери Самуила светлейшая, Елисаветы славнейшая и всех праведных жен, ихже закон прославляет, честнейшая и яко от сего многой чести и благодати удостоенная, исполни радости и веселия сердца к тебе прибегающих и даждь благодать твою рабе твоей, приемлющей твою скорую помощь, отверзая ей чрево, да твоим предстательством и заступлением улучит зачатие чада и прославит всесвятое Имя Богочеловека – Внука Твоего и Спаса нашего Иисуса Христа. Ему же подобает всякая слава, честь и поклонение со безначальным Его Отцем и пресвятым и благим и животворящим Его Духом ныне и присно и во веки веков. Аминь.

=========================

Молитва праведному Симеону Богоприимцу

Память: 3 / 16 февраля

По преданию был переписчиком Септуагинты (книг Ветхого Завета перевода семидесяти толковников, сделано в III веке) прожил около 270 лет в ожидании обещанного Богом — того дня, когда увидит Мессию вместе с Его Пречистой Матерью. Находился при Иерусалимском храме и, встретив долгожданного Богомладенца, принял Его на руки и изрек: «Ныне отпускаешь раба Твоего, Владыко, по слову Твоему, с миром, ибо видели очи мои спасение Твое, которое Ты уготовал пред лицем всех народов, свет к просвещению язычников и славу народа Твоего Израиля. Иосиф же и Матерь Его дивились сказанному о Нем. И благословил их Симеон и сказал Марии, Матери Его: се, лежит Сей на падение и на восстание многих в Израиле и в предмет пререканий, — и Тебе Самой оружие пройдет душу, — да откроются помышления многих сердец» (Лк. 2:25-35). Праведный Симеон — помощник в старости, молитвенник о мирном отшествии из жизни и христианском напутствии. Ему молятся о даровании терпения, смирения мудрости.

Праведный Симеон Богоприимец. Икона

***

Тропарь праведному Симеону Богоприимцу, глас 4

Симеон старец днесь веселится, восприят на руку свою Младенца Превечнаго Бога, от уз плоти разрешитися прося и вопия: видеста очи мои спасение Твое мирови.

Кондак праведному Симеону Богоприимцу, глас 4

Старец днесь отрешитися от юз моляшеся сего жития тленнаго, Христа восприят на руки, Зиждителя и Господа.

Молитва праведному Симеону Богоприимцу

О великий угодниче Божий, Богоприимче Симеоне! Предстоя престолу великаго Царя и Бога нашего Иисуса Христа, велие дерзновение имаши к Нему, во объятиих твоих нашего ради спасения носитися изволившему. К тебе убо, яко многомощному предстателю и крепкому о нас молитвеннику, прибегаем мы, грешнии и недостойнии (имена). Моли благость Его, яко да отвратит от нас гнев Свой, праведно по делом нашим на ны движимый, и презрев безчисленная прегрешения наша, обратит нас на путь покаяния и на стезе заповедей Своих утвердит нас. Огради молитвами твоими в мире живот наш, и во всем благом благое поспешение испроси, вся яже к животу и благочестию потребная нам даруя. Вся грады и веси страны нашея от всяких напастей и бед и напрасныя смерти предстательством твоим избави, и от всех враг видимых и невидимых покровом твоим защити. Яко да тихое и безмолвное житие поживем во всяком благочестии и чистоте и тако, в мире временное сие житие прешедше, в вечный достигнем покой, идеже сподобимся Небеснаго Царствия Христа Бога нашего. Ему же всякая слава подобает, со Отцем и Пресвятым Его Духом, ныне и присно и во веки веков. Аминь.

Вторая молитва праведному Симеону Богоприимцу

О Богоприимче Симеоне! Услыши нас, грешных раб Божиих (имена), и не отыми покров твой святый от нас, моли благость Господа, яко да отвратит от нас гнев Свой, праведно по делом нашим на ны движимый, и, презрев безчисленная прегрешения наша, обратит нас на путь покаяния и на стези заповедей Своих утвердит нас. Огради молитвами твоими в мире жизнь нашу и во всем благом благое поспешение испроси, вся к животу и благочестию потребная нам даруя, яко да тихое и безмолвное житие поживем во всяком благочестии и чистоте, и тако в вечный достигнем покой, идеже сподобим ся Небеснаго Царствия Христа Бога нашего, Емуже всякая слава подобает, со Отцем и Пресвятым Его Духом, ныне и присно и во веки веков. Аминь.

***

О здравии младенцев

МОЛИТВА ПОИМЕНОВАННОМУ ОТРОЧАТИ

(читается только по КРЕЩЕННОМУ младенцу!)

Господи Боже наш, в четыредесятный день младенец законному храму принесенный от Марии неискусобрачныя и Святыя Твоея Матере, и на объятиях праведнаго Симеона носимый, Сам Владыко всесильне, и принесеннаго сего младенца, явитися Тебе всех Творцу, благослови и на всякое дело благое и Тебе благоугодное возрасти, отгоняя от него всякую сопротивную силу, знамением воображения Креста Твоего. Ты бо еси храняй младенцы, Господи; да сподобився святаго Крещения, получит часть избранных Царствия Твоего, соблюдаемь с нами благодатию Святыя и Единосущныя, и Нераздельныя Троицы: Тебе бо подобает всякая слава, благодарение, и поклонение со Безначальным Твоим Отцем, и Пресвятым, и Благим, и Животворящим Твоим Духом, ныне и присно и во веки веков. Аминь.

Боже Отче Вседержителю, велегласней шим пророком Исаием предвозвестивый нам, еже от Девы воплощение Единороднаго Твоего Сына и Бога нашего, иже в последния дни благоволением Твоим, и содействием Святаго Духа, спасения ради нас человеков, безмерным благоутробием от Нея младенствовати изволивый, и по обычаю в законе святом Твоем, по исполнении дней очищения, святилищу принестися претерпе истинный Законоположник Сый; и на объятиях праведнаго Симеона носитися изволи, егоже таинства проображение в предреченном пророце, клещами угля явленное познахом; егоже и мы вернии подражание благодатию держим. Сам и ныне, сохраняяй младенцы Господи, благослови отроча сие, вкупе с родители и восприемники его, и сподоби его во время благопотребное и водою и Духом отрождения, сопричти е Святому Твоему стаду словесных овец, нарицающихся именем Христа Твоего: яко Ты еси в вышних Живый, и на смиренныя призираяй, и Тебе славу возсылаем, Отцу, и Сыну, и Святому Духу, ныне и присно и во веки веков. Аминь.

==============================================

 

С событием Сретения Господня связана икона Пресвятой Богородицы, именуемая «Умягчение злых сердец», или «Симеоново проречение», которую необходимо отличать от иконы »Семистрельная» (13 августа).

Икона «Симеоново проречение» символизирует исполнение пророчества праведного старца Симеона: «Тебе Самой оружие пройдет душу» (Лк. 2, 35).

«Умягчение злых сердец»… Сколько в одном названии этой иконы надежды — надежды на то, что будет когда-нибудь торжествовать правда на земле, что люди станут добры и милосердны, станут любить друг друга.

И как трудно это в нашем ожесточенном мире, и подчас только вид чужого страдания способен смягчить наше собственное злое сердце…
Такое толкование Симеонова пророчества и стало предметом нескольких «символических» икон Богородицы.
Все прибегающие к ним с молитвою чувствуют, что при умягчении сердца облегчаются страдания душевные и телесные, и сознают: когда молятся пред этими образами за врагов своих, тогда смягчаются их враждебные чувства, уступая место милосердию, утихают междоусобная брань и вражда.

Поделитесь с друзьями!

0

Вы можете пропустить чтение записи и оставить комментарий. Размещение ссылок запрещено.
Комментарии:

2 комментария к записи “Молитвы на Сретение Господне”

  1. Veronika:

    Огромное Вам спасибо за полезную, необходимую для уважающего себя христианина, информацию! Спасибо!

  2. Оксана:

    Благодарю,как всегда очень интересная статья с подборками,полезно для общего развития.

Оставить комментарий